Prokuroria Themelore në Prishtinë ka inicuar rast në drejtim të veprës penale “ngacmim seksual” ndaj profesorit të Universitetit të Prishtinës, Xhevat Krasniqi.
Kështu ka konfirmuar për Paparacin zëdhënësja e prokurorisë, Laureta Ulaj.
Ajo tha se prokuroria e ka autorizuar policinë në ndërmarrjen e veprimeve hetimore.
“Ju njoftojmë se Prokuroria Themelore në Prishtinë, sipas detyrës zyrtare ka iniciuar rast në drejtim të veprës penale ‘ngacmimi seksual’, sipas KPRK-së. Ashtu siç iu kemi njoftuar, Prokuroria Themelore në Prishtinë ka autorizuar policinë në ndërmarrjen e veprimeve hetimore, me qëllim të grumbullimit të provave dhe informatave lidhur me këtë çështje. Aktualisht mund t’iu konfirmojmë se në kuadër të veprimeve hetimore janë duke u marrë deklarata të personave të përfshirë në këtë rast, si dhe veprime të tjera, konform dispozitave të KPPRK-së”, tha Ulaj.
Profesori i UP-së po akuzohet nga 27 studentë për ngacmim seksual.
Gjatë ditës së martë, Këshilli i Etikës i ka rekomanduar Rektoratit pezullimin e Krasniqit.
Rektori i UP-së mori vendim për pezullimin nga puna të profesori Xhevat Krasniqi me efekt të menjëhershëm.
Në një njoftim për media, Universiteti i Prishtinës tha se pezullimi nga puna i profesorit vlen derisa të përfundojnë veprimet hetuese nga ana e Prokurorisë se Shtetit.
Ndërkaq kundër këtij vendimi kanë dalë nga Lëvizja Feministe Studentore. Ata e quajnë vendimin e UP-së të papranueshëm dhe ikje nga përgjegjësia./Paparaci