Në komentim të raportit të DASh-it, deputetja e LDK-së, Valentina Bunjaku-Rexhepi thotë ky raport tregon për keqqeverisje nga Albin Kurti.
Ajo thotë se theksi vëhet tek “pengimi i drejtësisë së pavarur, dëmtimin e gazetarisë së pavarur, dëmet në buxhetin e Kosovës nga korrupsioni i frikshëm, pasojat fatale nga dhuna gjinore dhe politikat e gabuara ndaj integrimit të komuniteteve etnike”.
Ndër tjera, deputetja thekson se “raporti i DASH-it duhet të bëhet bazë e mjaftueshme për të kërkuar largimin e kësaj Qeverie edhe para përfundimit të mandatit zyrtar dhe ky raport të shërbejë për votën e ardhshme të ndëshkimit të Qeverisë Kurti 2 nga qytetarët”.
“Departamenti Amerikan i Shtetit (DASH) i dha një vlerësim tejet negativ Qeverisë Kurti 2, me publikimin e fundit, atë që tashmë e kishte adresuar edhe LDK-ja si opozitë dhe unë si deputete në çdo fjalim timin në Kuvendin e Kosovës dhe Komisionet Parlamentare si anëtare.
Gjetjet kryesore të DASH-it për Qeverinë Kurti 2 janë:
- Pavarësia e Gjyqësorit është shkelur, kërcënuar dhe prekur, duke shfaqur shqetësim për (PA)DREJTËSINË në Kosovë.
- Kufizimet në LIRINË E SHPREHJES dhe të MEDIAS janë rritur dhe është mundësuar krijimi i një ambienti armiqësor për gazetarët, rritja e dhunës dhe kërcënimeve ndaj gazetarëve, duke shfaqur shqetësim për DEMOKRACINË në Kosovë.
- KORRUPSIONI qeveritar është serioz, i lartë, pa përgjegjësi, pa ndëshkueshmëri, pa llogaridhënie dhe transparencë.
- DHUNA GJINORE ka arritur në përmasa alarmante, qoftë si dhunë brenda familjes, qoftë si dhunë nga partneri intim, e deri në vrasje tragjike.
- QASJA E GABUAR ndaj komuniteteve etnike”, shkruan ajo.