Kryetari i VMRO-DPMNE-së, Hristijan Mickoski në konferencën për shtyp pas përfundimit të raundit të parë të zgjedhjeve presidenciale të mërkurën, tha se pas publikimit të rezultateve të para, ka kontaktuar me opozitën shqiptare, konkretisht me Arben Taravarin.
Mickoski tha se i uroi e “qeveri të ardhshme në Maqedoni Taravarit.
“Para se të drejtohem para jush, u dëgjova me opozitën shqiptare, me z.Arben Taravarin, e urova për rezultatin dhe i dëshirova zgjedhje parlamentare të suksesshme dhe Qeveri të ardhshme në Maqedoni”, tha Mickoski.
Kandidatja e VMRO-DPME, Gordana Siljanovska – Davkova, e fitoi bindshëm raundin e parë të zgjedhjeve presidenciale.
Sipas Komisionit Shtetëror të Zgjedhjeve (KSHZ), Siljanovska – Davkova i fitoi 40.10 për qind të votave, ndërsa Stevo Pendarovski nga Lidhja Social Demokrate (LSDM) në pushtet, i fitoi 19.93 për qind të votave.
Shtatë kandidatë garuan në rundin e parë, në mesin e të cilëve edhe dy shqiptarë, të cilët nuk ia dolën të fitonin vota të mjaftueshme për ta siguruar balotazhin.
Bujar Osmani nga Fronti Evropian i mori 13.36 për qind të votave, ndërsa Arben Taravari nga koalicioni opozitar VLEN 9.21 për qind të votave.