Departamenti Special i Gjykatës Themelore në Prishtinë ia ka caktuar masën e paraburgimit të pandehurit J.SH., i dyshuar për krime lufte në Kosovë.
Themelorja ka njoftuar të dielën se i pandehuri i nacionalitet boshnjak e shtetas serb dyshohet për krime kundër popullatës civile në bashkëkryerje, e në paraburgim do të qëndrojë një muaj.
Gjykata tha se ekzistojnë kushtet dhe arsyet ligjore për caktimin e kësaj mase.
“Gjykata vlerësoi se ekzistojnë kushtet dhe arsyet ligjore për caktimin e paraburgimit, respektivisht përpos dyshimit të bazuar në rastin konkret ekziston edhe rreziku i ikjes së të pandehurit, si kusht për caktimin e paraburgimit, i njëjti lehtë mund të arratiset dhe t’i shmanget ndjekjes penale, pasi kemi të bëjmë me një vepër penale të rëndë e komplekse dhe rreziku real i shmangies nga ndjekja penale e të pandehurit J.SH është më se evidente”, thuhet në njoftimin e Gjykatës Themelore.