Në moshën 69-vjeçare është ndarë nga jeta ish-kryetari i Pejës dhe ish-deputeti i Kuvendit të Kosovës, Ali Lajçi.
Lajçi u lind në Malaj të Rugovës, Pejë, më 3 janar 1955.
Ai ka përfunduar gjimnazin në Pejë dhe Fakultetin Filologjik në Prishtinë.
Lajçi ishte një zë i fortë dhe i vendosur për të mbrojtur interesat e Kosovës.
Që nga viti 2001 deri në vitin 2007 ka qenë kryetar i Komunës së Pejës, për të vazhduar më pas aktivitetin e tij si deputet.
Ai ka qenë ish-deputet i Lidhjes Demokratike të Kosovës dhe i Lëvizjes Vetëvendosje.
Lajçi është ish i dënuar politik nga regjimi i Serbisë.
Në vitin 1981 ai ka qenë organizator i demonstratave, arsye për të cilën është dënuar me 15 vite burg.
Pas lirimit në 1991 sërish u burgos në vitin 1993 për organizimin e rezistencës së armatosur (UÇK).
Për vdekjen e tij ka shkruar edhe Lëvizja Vetëvendosje – dega në Pejë.
“Me dhembje të thellë mësuam lajmin e ndarjes nga jeta të Ali Lajçit. Ai ishte një figurë e rëndësishme në historinë e Kosovës, një figurë e shquar në rrugën për lirinë dhe pavarësinë e vendit të tij”- thuhet në njoftim.
LVV-ja thotë se kontributi i Lajçit si kryetar i Komunës së Pejës dhe deputet i Kuvendit të Kosovës do të kujtohet gjithmonë.
“Angazhimi i tij për të mbrojtur territorin dhe sovranitetin e vendit prej Demarkacionit të Murat Mehës ishte i shquar dhe i pamohueshëm. Ai ngriti zërin dhe u bë zëdhënësi i popullit, duke paraqitur argumente të forta kundër kësaj marrëveshje të dëmshme për vendin tonë”- bëhet e ditur në postim.