“Përshëndetja e fundit miku im”.
Kështu shkruhet në një video që i shfaq dy të rinjtë nga Prizreni, Petrit Gashi (20-vjeç) dhe Besnik Haliti (31-vjeç), pak para aksidentit tragjik që ua mori jetët atyre.
Pamjet, të cilat i kanë publikuar miqtë e tyre, i tregojnë dy djemtë në një lokal në Suharekë në ditën e aksidentit që ndodhi të dielën në fshatin Shirokë, disa kilometra larg qytetit të Suharekës.
Dy të rinjtë përshëndeten me mikun e tyre në lokal dhe pasi realizojnë porosinë dalin nga aty, tregojnë pamjet.
Ata po vozisnin me motoçikletë të dielën kur një shofere e një veture dyshohet se nga pakujdesia kaloi në shiritin e kundërt të rrugës dhe goditi motoçikletën.
Policia tha se si pasojë e aksidentit, 20 dhe 31-vjeçari humbën jetën në vendin e ngjarjes.
“Si pasojë e aksidentit vozitësi i motoçikletës si dhe viktima (pasagjeri që gjendej në motoçikletë) mashkull kosovar kanë ndërruar jetë në vendin e ngjarjes sipas konstatimit të mjeku kujdestar, kurse lëndime trupore kishin pësuar dy viktima femra kosovare, pasagjere në veturë”, tha Policia.