Sot me fillim nga ora 16:15 stadiumi “Santiago Bernabeu” do të jetë nikoqir i përballjes interesante mes Real Madridit dhe Cadizit, e vlefshme kjo për xhiron e 34 të La Ligas.
Në xhiron e fundit të zhvilluar në kampionatin spanjoll, Reali e mposhti Real Sociedadin 1:0, kurse Cadizi barazoi 1:1 me Mallorcan, raporton KosovaPress.
Momentalisht, Reali zë vendin e parë me 84 pikë dhe mund ta sigurojë titullin e La Ligas sot nëse Barcelona nuk arrin ta mposhtë Gironan.
Në anën tjetër, Cadizi po lufton për mbijetesë, ku gjendet në vendin e 18 me 26 pikë, pesë sosh më pak se Celta Vigo që zë vendin e 17 jashtë zonës së rrezikut.
Sa i përket ndeshjes së sotme, te Reali mungon vetëm Alaba, kurse te Cadizi nuk do të paraqiten Hernandez, Jose Mari, Kouame, Mere, Ousou dhe San Emeterio.
Në formacionin titullar te Reali rikthehet Thibaut Courtois, i cili ka vuajtur me lëndime tërë sezonin. Formacionet zyrtare janë publikuar dhe ato i gjeni më poshtë.
Real Madrid (4-2-3-1): Courtois; Garcia, Fernandez, Militao, Carvajal; Modric, Camavinga; Ceballos, Diaz, Guler; Joselu
Cadiz (4-2-3-1): Ledesma; Zaldua, Fali, Chust, Hernandez; Alcaraz, Escalante; Sobrino, Fernandez, Navarro; Ramos