Gjykata merr vendim për Ergys Arrazin i cili dyshohet se shtyu në vetëvrasjen e gruas dhe tre fëmijëve

Gjykata e Shkodrës ka pranuar kërkesën e prokurorisë dhe ka caktuar masën e sigurisë “arrest në burg” pa afat për Ergys Arrazin. Ai akuzohet për veprën penale “shkaktim i vetëvrasjes”.

Arrazi mbërriti në gjykatë ndërsa mbante një kapuç për t’ju shmangur mediave. 31 vjeçari u arrestua dy ditë më parë nën akuzën e shkaktimit të vetëvrasjes së bashkëshortes dhe tre fëmijëve.

Trupi i Alma Arrazit dhe djalit të vogël 3 vjeçar u gjetën sot ndërsa vajza e vogël 8 vjeçare u gjet pasditën e së hënës. Në fundjavë, një peshkatar gjeti edhe trupin e vajzës së madhe 9 vjeçare.

Prokuroria e Shkodrës, në një deklaratë për shtyp të hënën, deklaroi se Alma Arrazi është takuar me kunatën e saj në një lokal në lagjen “Iliria” në Shkodër, pasditen e datës 2 maj. Më pas, sipas dëshmisë se kunatës, rreth orës 20:10, gruaja ka dalë nga lokali dhe ka marrë rrugën drejt Urës së Bunës.

Sipas prokurorisë, 39 vjeçarja ka ndërmarrë aktin ekstrem së bashku me fëmijët për shkak të dhunës së vazhdueshme psikologjike, shfaqur në formën e ofendimeve të vazhdueshme dhe tradhtisë bashkëshortore nga ana e partnerit të saj Ergys Arrazi, duke prekur rëndë dinjitetin e saj./abcnews.al