Ministri i Punëve të Jashtme të Maqedonisë së Veriut, Bujar Osmani, ka treguar se ka qenë ndër ministrat e parë që ka ngritur në Komitetin e Ministrave të Këshillit të Evropës çështjen e anëtarësimit të Kosovës në këtë organizatë.
Ai ka vlerësuar se Maqedonia do të vazhdojë ta mbështes fuqishëm Republikën e Kosovës në këtë proces.
Në një intervistë për median Nacionale, Osmani ka bërë me dije se deputet e VMRO-së nuk kanë marrë pjesë në mbledhjen e Asamblesë Parlamente ku është votuar për anëtarësimin e Kosovës në KiE.
“Unë kam qenë një ndër ministrat e parë të Jashtëm i cili në Komitetin e Ministrave të Këshillit të Evropës ka ngritur çështjen e anëtarësimit të Kosovës dhe Maqedonia e Veriut do të vazhdojë ta mbështesë fuqishëm Kosovën me të gjitha kapacitete e saja. Për fat të keq, deputetët e VMRO-DPMNE-së nuk morën pjesë në votimin e fundit në Asamblenë Parlamentare. Dhe, kjo është hipokrizia më e shëmtuar e një partie që ndryshe flet e ndryshe vepron!”, ka thënë Osmani.
Në lidhje me kërkesën e Francës dhe Gjermanisë ndaj Kosovës për dërgimin e Asociacionit në Gjykatën Kushtetuese, ai ka thënë se Kosova duhet të kultivojë partneritet me aleatët.
Sipas tij, Asociacioni nuk duhet të jetë pikë e veçantë gjatë sinkronizimit të hapave të dala nga marrëveshja e Brukselit dhe aneksi i Ohrit.
“Kosova duhet të kultivojë partneritetin dhe besimin e ndërsjellë me SHBA dhe shtetet kryesore të Bashkimit Evropian. Asociacioni nuk duhet të jetë pikë e veçantë gjatë sinkronizimit të hapave të dala nga marrëveshja e Brukselit dhe aneksi i Ohrit, por marrëveshjet duhet të implementohen nga dyja palët”, ka vlerësuar Osmani.