Ish-zëvendësministri i Punëve të Jashtme, Anton Berisha ka thënë se me refuzimin për dërgim të draftit të statutit të Asociacionit në Gjykatën Kushtetuese, qeveria i ka dhënë fund shpresave për anëtarësim në Këshillin e Evropës.
Në një deklarim në rrjetin social Facebook të mërkurën, Berisha ka thënë se kryeministri Albin Kurti është “shumë dyshues” në veprimet e tij politike dhe paralajmëroi zhytjen e vendit në një krizë të brendshme politike.
“Është e pamundur që disa prej nesh ta kemi ditur, e deklaruar publikisht, se anëtarësimi i Kosovës në Këshillin e Evropës është i kushtëzuar me dorëzimin e draft-statutit te Asociacionit, e këtë kusht të mos e ketë ditur deri me sot kryeministri Kurti. Duke qenë se ai përditë është duke dëshmuar se Kosova për të është vetëm një instrument për planet e tij personale”, tha ai, teksa vazhdoi:
“Që tash pas këtij veprimi kemi te drejte te themi se ai është shume dyshues, atëherë Kosova nuk do të anëtarësohet në KiE ashtu siç edhe trumpetoi ministri rus Lavrov, por do të zhytet në krizë të brendshme, në beteja të kota politike elektorale për të mjegulluar goditjen e radhës qe i bëhet shtetit të Kosovës”.