Mbledhja e Komitetit të Ministrave të Këshillit të Evropës nuk e ka përfshirë Kosovën në agjendë.
Pas votimit për pranimin e Kosovës në Asamblenë Parlamentare të Këshillit të Evropës muajin e kaluar, ishte planifikuar që çështja e anëtarësimit të Kosovës në KiE të vendosej në mbledhjen e Komitetit të Ministrave më 17 maj.
Megjithatë, Kosova nuk është në agjendën e kësaj mbledhje që mbahet javën e ardhshme, kanë konfirmuar nga KiE.
“Në këtë moment, Kosova nuk është në agjendën e takimit të Komitetit të Ministrave. Nuk kemi më shumë informacion në këtë fazë, por do t’ju njoftojmë për zhvillimet”, kanë thënë nga Këshilli i Evropës, shkruan sot Koha.net.
Vendet e QUINT-it kanë kërkuar kushtëzimin e anëtarësimit në KiE me dërgimin në Gjykatën Kushtetuese të draft-statutit të Asociacionit të komunave me shumicë serbe.
Por, Qeveria e Kosovës ka thënë se nuk e pranon këtë kushtëzim.
Kryeministri Albin Kurti e ka quajtur të mërkurën “absurd” kushtëzimin e Francës, Gjermanisë dhe Italisë që Kosova ta dërgojë draftstatutin e Asociacionit të propozuar nga Bashkimi Evropian në Gjykatën Kushtetuese për interpretim.