Januz Veselaj është polici që ka mbetur i plagosur nga arma e zjarrit në Zllakuqan të Klinës.
Rasti ka ndodhur në orët e para të mëngjesit të së enjtes, derisa disa persona kishin hyrë për të vjedhur në shtëpinë e prifit.
Me të arritur njësitet policore në vendngjarje, ata kanë hasur në rezistencë. Kështu të dyshuarit kanë shtënë me armë zjarri, me çrast lëndime trupore ka marrë polici Januz Veselaj nga Gllareva.
Zyrtari policor është në gjendje të mirë shëndetësore dhe ndodhet jashtë rrezikut për jetë.
Këtë e ka konfirmuar zëdhënësi i Policisë për Rajonin e Pejës, Fadil Gashi.
“Sot në orët e mëngjesit, rreth orës 03:56 stacioni policor në Klinë është njoftuar se në fshatin Zllakuqan në shtëpinë e banimit të priftit kanë hy disa persona. Policia menjëherë ka dalë në vend të ngjarjes dhe me të arritur aty, afër objektit kanë hasur në rezistencë me çrast një zyrtar policor është lënduar nga arma e zjarrit. Zyrtari i lënduar është dërguar në Emergjencën e Spitalit Rajonal në Pejë dhe sipas mjekut kujdestar ai është jashtë rrezikut për jetë”, tha Gashi./Paparaci