Xhiroja e 33-të e Superligës së Kosovës ka sjellë rezultate interesante duke “prishur matematikat” për skuadrat që ndodhen në garë për titullin e kampionit.
Llapi u ndal me barazim nga skuadra e Gjilanit, duke përfunduar ndeshjen me rezultat të barabartë 1:1. Skuadra e drejtuar nga Tahir Batatina humbi dy pikë të vlefshme duke mbetur tashmë me katër pikë pas Ballkanit që ndodhet në pozitën e parë.
Kampioni aktual i Kosovës nuk lejoi befasi nga Malisheva. Ballkani arriti të marrë tre pikë të reja për ta vazhduar garën për titullin e tretë radhazi në Superligën e Kosovës.
Pretendenti tjetër për titull, Drita, arriti fitore ndaj Prishtinës, duke barazuar pikët me Llapin që ndodhet në pozitën e dytë. Llapi e Drita kanë nga 65 pikë kur kanë mbetur gjithsej edhe tre xhiro deri në përfundimin e kampionatit.
Fitore shënoi edhe Feronikeli që arriti ta mposht Lirinë me rezultat të thellë 4:1, ndërkaq ndeshja mes Fushë Kosovës e Dukagjinit ka nisur me vonesë.
Xhiron e ardhshme që zhvillohet të dielën Llapi do të përballet me Malishevën, teksa punë më të lehtë do të kenë Drita e Ballkanit. Drita do të pres në shtëpi Feronikelin ’74, kurse Ballkanit pret Fushë Kosovën./Paparaci