Richard Grenell është përfshirë në një polemikë ditore në Serbi të premten, në një reagim ndaj pretendimeve të një deputeteje serbe për kinse një marrëveshje mes ish-presidentit Hashim Thaçi dhe Aleksandar Vuçiqit për shfuqizimin e Gjykatës Speciale.
Ish emisari i ShBA-së për dialogun Kosovë-Serbi ka thënë se anëtarja e Komisionit për Kontrollin mbi Institucionet e Sigurisë dhe deputetja e Partisë për Liri dhe Drejtësi (SSP) Marinika Tepiq “nuk e di çka flet”.
Tepiq kërkoi sot që Richard Grenell dhe presidenti Vuçiq, të ftohen para Komisionit për shkak të intervistës së fundit të Grenellit me djalin e ish-presidentit të SHBA-së, Donald Trump Jr.
Ajo pretendon se Grenell ka deklaruar në intervistë se ai, Trump, Vuçiq dhe Thaçi kishin arritur më parë një marrëveshje historike që përfshinte shfuqizimin e Gjykatës Speciale.
“A nuk mendoni se do të ishte mirë që ne ta dinim dhe Serbia ta dinte nëse kjo është e vërtetë apo zoti Grenell po përhap informacione të rreme për Aleksandar Vuçiqin? Le të na thotë mirë Grenell nëse është e vërtetë që Vuçiq ka bërë marrëveshje historike për të shfuqizuar Gjykatën e UÇK-së për krime kundër serbëve? Thirrni edhe presidentin e Serbisë – e kam regjistrimin, mund ta lëshojmë, është një intervistë në një platformë publike amerikane, kështu që edhe në rast se ai shmang të vijë e të na përgjigjet, ndoshta të paktën do t’u përgjigjet gazetarëve”, tha Tepiq.
Ndërkaq, Grenell ka reaguar në rrjetet sociale. Ka thënë se Tepiq “nuk e di për çka po flet.”
“Kjo grua nuk e di se për çfarë po flet. Ajo nuk ishte e përfshirë fare. Ajo po nxjerr konkludime të shpejta pasi dëgjoi një intervistë”, ka thënë ai.
Grenell tha se ideja ishte që Kosova dhe Serbia t’i hetonin krimet e dyshuara të luftës veç e veç secila – jo përmes një gjykate ndërkombëtare jashtë vendeve të tyre. /Paparaci.com