Skuadra më e trofeshme në vend Sigal Prishtina ka pësuar dje disfatë në shtëpi duke u mposhtur nga skuadra prizrenase Prizreni 16 me rezultat final 100:108.
Fillimi i ndeshjes ishte i barabartë deri te rezultati 14:14, por më pas prizrenasit filluan shkëputjen duke e fituar çerekun e parë me rezultat 22:30.
Megjithatë bardhekaltërtit nuk u dorëzuan duke e mbyllur pjesën e parë me rezultat 49:56.
Prishtinasit vazhduan me lojë të mirë edhe në periodën e tretë, ku shkrinë epërsinë në vetëm dy pikë, 60:62
Ndeshje interesante u zhvillua edhe në 10 minutat e fundit, me vendasit që u munduan të rikthehen por Prizreni 16 menaxhoi mirë epërsinë dhe triumfoi 100:108.
Te Sigal Prishtina u dalluan Jan Palokaj me 16 pikë e shtatë kërcime dhe Jetmir Zeqiri me 16 pikë e tetë kërcime, kurse te Prizreni 16 u dalluan Courtney Fells me 31 pikë e pesë asistime dhe Ivan Koljeviq me 23 pikë, shtatë asistime dhe tetë kërcime.
Prizreni 16 ka pesë fitore dhe dy humbje ndërsa Sigal Prishtina ka tri fitore dhe tri humbje.