Andy Murray, i cili u tërhoq nga tenisi dy vjet më parë, do të jetë sërish në kutinë e trajnerëve në Centre Court të All England Club. Këtë herë, ai do të jetë aty për të udhëzuar britanikun Jack Draper, pasi i është bashkuar ekipit të tij për sezonin në fushën me bar. Në një intervistë për BBC Sport, Murray shpjegoi arsyet e rikthimit të tij në tenis, mendimin për rikthimin e Serena Williams dhe mënyrën se si po e mbush kohën pas përfundimit të karrierës si lojtar.
Murray, 39 vjeç, kishte kaluar 12 muaj larg trajningut pas ndërprerjes së bashkëpunimit me Novak Djokovic, duke iu përkushtuar familjes, golfit dhe interesave të biznesit. Ndonëse në prill deklaroi se nuk ishte gati për t’u rikthyer në trajnim, një muaj më vonë ai pranoi ftesën e Draper, të cilin e ka mbështetur prej kohësh si mentor jozyrtar. “Kur Jack më pyeti, u mendova, bisedova me gruan time dhe i thashë se do të doja ta ndihmoja,” tha Murray.
Roli i Murray është ai i një “super-trajneri”, një dinamikë e ngjashme me atë që ai kishte me Ivan Lendl, i cili e ndihmoi të fitonte tre tituj Grand Slam. Aktualisht, dyshja po punon në Qendrën Kombëtare të Tenisit në Londër, ndërsa Draper po rikuperohet nga problemet fizike. Draper, 24 vjeç, do të marrë pjesë në turneun e Eastbourne këtë javë për të testuar formën e tij përpara Wimbledon-it.
Murray shprehu besim te aftësitë e Draper, duke theksuar se fokusi aktual është rikthimi i tij në garë në mënyrë të qëndrueshme. Lidhur me Serena Williams, Murray u shpreh se nuk është i habitur nga rikthimi i saj, pasi kishin biseduar për dëshirën e saj për të luajtur në Miami Open të vitit të kaluar.
Sa i përket mundësisë së një rikthimi të tij në moshën 44-vjeçare, Murray përjashtoi një mundësi të tillë. “Nuk mendoj se do të isha fizikisht i aftë për ta bërë këtë,” tha ai. Aktualisht, ai po e mbush kohën duke u marrë me golf, padel, shah dhe menaxhimin e hotelit të tij pranë Dunblane.