Mesfushori i Ghanës, Thomas Partey, pritet të jetë pjesë e skuadrës për ndeshjen e Botërorit kundër Anglisë, e cila do të zhvillohet të martën në Boston. Federata Angleze e Futbollit (FA) nuk ka marrë një qëndrim zyrtar lidhur me ceremoninë e përshëndetjes para ndeshjes, duke ua lënë lojtarëve vendimin nëse dëshirojnë t’i japin dorën Parteyt. Në radhët e Anglisë luajnë dy ish-bashkëlojtarë të tij te Arsenali, Declan Rice dhe Bukayo Saka.
Partey është përballur me akuza për pesë raste të përdhunimit dhe një rast të sulmit seksual, ndërsa më vonë janë shtuar edhe dy akuza të tjera për përdhunim. Ai i ka mohuar të gjitha akuzat, ndërsa avokati i tij ka deklaruar se lojtari mirëpret mundësinë për të pastruar emrin e tij në gjykatë. Procesi gjyqësor në Southwark Crown Court është planifikuar të mbahet vitin e ardhshëm.
Lojtari mungoi në ndeshjen e parë të Ghanës kundër Panamasë në Toronto, pasi autoritetet kanadeze i refuzuan hyrjen. Megjithatë, ai është i disponueshëm për ndeshjen në Boston, pasi Shtetet e Bashkuara i kanë dhënë vizën e nevojshme. Trajneri i Ghanës, Carlos Queiroz, ka mbështetur lojtarin, duke deklaruar se ai duhet të konsiderohet i pafajshëm derisa të provohet e kundërta.
Çështja e vizës për në Kanada shkaktoi reagime të ashpra politike në Ganë, pasi u zbulua se Partey kishte deklaruar në aplikim se nuk ishte arrestuar apo akuzuar kurrë për ndonjë vepër penale. Ky gabim çoi në dështimin e apelit të Federatës së Futbollit të Ganës (GFA) për të kundërshtuar refuzimin e vizës. GFA ka mohuar çdo neglizhencë, duke theksuar se ka vepruar me mirëbesim për të mbështetur delegacionin e saj.
Në këtë Botëror marrin pjesë edhe lojtarë të tjerë të akuzuar për vepra të ngjashme, si mesfushori japonez Kaishu Sano dhe mbrojtësi marokjan Achraf Hakimi. Ndërsa për Hakimin procesi gjyqësor në Francë është konfirmuar, për Sanon akuzat u hoqën pas një marrëveshjeje financiare me palën tjetër. Ekspertët ligjorë vlerësojnë se FA nuk do të ndërhyjë në protokollin e ndeshjes për të shmangur ndikimin në procesin gjyqësor të Parteyt.