Trashëgimia e Whitney Houston ka publikuar një deklaratë zyrtare në Instagram, përmes së cilës kundërshton pretendimet e Oprah Winfrey se këngëtarja e ndjerë kishte rënë nga skena gjatë emisionit të saj për shkak të përdorimit të substancave. Sipas deklaratës, incidenti i vitit 2009 ndodhi gjatë një prove të zërit dhe ishte pasojë e ndriçimit të dobët në atë zonë dhe mungesës së njohjes së skenës nga ana e këngëtares.
“Whitney ra nga skena, por kjo ndodhi gjatë një prove të zërit për shkak të errësirës dhe mosnjohjes së skenës. Ajo absolutisht nuk ishte nën ndikimin e substancave,” thuhet në reagimin e trashëgimisë së këngëtares. Në të njëjtën deklaratë theksohet se, ndonëse fituesja e çmimit Grammy u përball me beteja personale gjatë jetës së saj, është e pasaktë dhe e padrejtë që këto vështirësi të lidhen me çdo performancë apo kapitull të jetës së saj.
Gjatë një bisede në festivalin Cannes Lions, Winfrey kishte pretenduar se Houston ishte në një fazë relapsi kur mbërriti për të performuar në atë që do të ishte paraqitja e saj e fundit në emision. Winfrey deklaroi se kishte kërkuar nga publiku që të mos publikonin asnjë fotografi të incidentit, duke u shprehur se një gjë e tillë do ta shkatërronte këngëtaren.
Trashëgimia e Houston vlerësoi se ajo që publiku pa në skenë ishte rezultat i disiplinës, talentit dhe përkushtimit të saj, e jo i supozimeve që të tjerët projektojnë. Ata kërkuan që këngëtares t’i ofrohet dinjiteti i së vërtetës, duke bërë thirrje për shmangien e përsëritjes së miteve.
Deri në këto momente, Oprah Winfrey nuk ka bërë asnjë koment lidhur me deklaratën e trashëgimisë së Whitney Houston. Biseda e Winfrey në Cannes Lions u zhvillua pasi ajo u nderua me çmimin LionHeart në teatrin Lumière.