Departamenti i Tregtisë së Shteteve të Bashkuara ka hequr kontrollet e eksportit për modelet e inteligjencës artificiale Fable dhe Mythos të kompanisë Anthropic. Ky vendim vjen më pak se tri javë pasi kompanisë iu urdhërua të pezullonte aksesin në modelet e saj më të avancuara për shkak të shqetësimeve për sigurinë kombëtare.
Anthropic njoftoi përmes një deklarate në platformën X se do të fillojë rikthimin e aksesit. Në një letër dërguar kompanisë, sekretari amerikan i Tregtisë, Howard Lutnick, konfirmoi se kontrollet e eksportit janë tërhequra dhe se nuk kërkohet më licencë për eksportimin e këtyre modeleve.
Lutnick deklaroi se Anthropic është pajtuar që të identifikojë dhe adresojë në mënyrë proaktive rreziqet e sigurisë që lidhen me modelet. Kompania gjithashtu është zotuar të bashkëpunojë me qeverinë amerikane për protokollet dhe standardet e modeleve Mythos, Fable dhe atyre të ardhshme, si dhe të njoftojë autoritetet për çdo aktivitet keqdashës.
Shtetet e Bashkuara kanë shtuar mbikëqyrjen e publikimeve të reja të inteligjencës artificiale për të identifikuar kërcënimet e mundshme. Ekzistojnë shqetësime se modelet e avancuara, të cilat po nxisin investime të mëdha në këtë sektor, mund të keqpërdoren nga inteligjenca ushtarake në vende si Kina apo Rusia.
Anthropic kishte çaktivizuar modelet Mythos 5 dhe Fable 5 pas urdhrit për kontrollin e eksportit të datës 12 qershor. Të premten, qeveria amerikane lejoi kompaninë që të publikojë modelin Mythos 5 për disa organizata të përzgjedhura në SHBA, duke ndryshuar pjesërisht urdhrin e mëparshëm.
Procesi i verifikimit të kompanive që mund të kenë akses në këto modele ka shkaktuar kritika. Drejtori ekzekutiv i OpenAI, Sam Altman, deklaroi javën e kaluar se testimi i sigurisë është i nevojshëm, por shtoi se nuk e mbështet idenë që qeveria të përzgjedhë klientët. OpenAI e ka shtyrë lansimin e plotë publik të modelit GPT-5.6 me kërkesë të qeverisë amerikane, duke kufizuar aksesin vetëm për një grup të vogël partnerësh të verifikuar.
Burimi: theguardian.com