Kancelari gjerman, Friedrich Merz, ka mbrojtur shpenzimet e vendit të tij për mbrojtjen në kuadër të NATO-s. Kjo deklaratë erdhi të premten, pak kohë pasi presidenti amerikan, Donald Trump, përsëriti kritikat e tij ndaj anëtarëve të aleancës për nivelin e shpenzimeve ushtarake.
Trump i ka cilësuar shpenzimet e anëtarëve të NATO-s si “qesharake” dhe “të njëanshme” në postimet e tij të fundit në platformën “Truth Social”. Në një nga këto postime, ai pohoi se shpenzimet e Gjermanisë ndërmjet viteve 2014 dhe 2025 kanë qenë shumë më të ulëta krahasuar me ato të Shteteve të Bashkuara dhe aleatëve të tjerë.
Ai e përshkroi këtë si përpjekjen më të madhe që vendi ka bërë ndonjëherë për të forcuar kapacitetet e veta mbrojtëse, duke shtuar se Gjermania nuk ka arsye të shmanget nga askush.
Liderët e NATO-s kanë rënë dakord që të shpenzojnë 3.5 për qind të PBB-së së tyre për mbrojtje deri në vitin 2035, një rritje kjo nga objektivi i mëparshëm prej 2 për qind.
“Ne do ta arrijmë pragun prej 3.5 për qind të vendosur në Hagë që në vitin 2029”, u shpreh Merz para gazetarëve, duke shtuar se kjo do të ndodhë shumë më herët se afati i dakorduar.
Marrëdhëniet ndërmjet SHBA-së dhe aleatëve evropianë kanë qenë të tensionuara për shkak të çështjeve të ndryshme, përfshirë angazhimet e Trump-it për të marrë kontrollin e territorit autonom danez të Groenlandës, si dhe luftën e SHBA-së dhe Izraelit në Iran. Trump ka kritikuar vazhdimisht aleatët evropianë për mosangazhimin e tyre në përpjekjet luftarake.
Burimi: aljazeera.com