Me rritjen e çmimeve të biletave ajrore dhe karburantit, gjithnjë e më shumë udhëtarë amerikanë po kthehen te trenat. Numri i pasagjerëve ka arritur rekorde të reja gjatë dy viteve të fundit, ndërsa çmimet e karburantit mbeten mbi nivelet e periudhës para luftës në Iran. Megjithatë, ata që nuk janë të njohur me rrjetin hekurudhor amerikan mund të zhgënjehen, pasi shumë qytete nuk kanë lidhje të mira hekurudhore apo shërbime me shpejtësi të lartë.
Në mes të shekullit të 20-të, SHBA-ja prioritizoi financimin federal për autostrada dhe aeroporte, duke e bërë udhëtimin me makinë dhe avion më efikas se atë me tren. Për dallim nga shumë vende evropiane, SHBA-ja u fokusua te trenat e mallrave, të cilët ishin më fitimprurës. Si pasojë, infrastruktura e sotme hekurudhore është projektuar kryesisht për transportin e mallrave të rënda, e jo për pasagjerë me shpejtësi të lartë.
Rruga më e njohur e kompanisë Amtrak, korridori verilindor, lidh Bostonin me Washington D.C. në rreth shtatë orë për 457 milje (735 kilometra). Allan Zarembski, drejtor i programit të inxhinierisë dhe sigurisë hekurudhore në Universitetin e Delaware, shpjegon se kurbat e shinave që ndjekin terrenin e bëjnë të vështirë shpejtësinë e lartë. Sipas tij, drejtimi i shinave është një proces i kushtueshëm që kërkon blerjen e tokave në zona të populluara dendur.
Në vitin 2008, Kalifornia nisi një projekt për një tren të shpejtë midis Los Anxhelosit dhe San Franciskos, me synimin për të shkurtuar udhëtimin nën tri orë. Megjithatë, projekti ka mbetur në fazën e planifikimit, me kosto që tani parashikohen të kalojnë 100 miliardë dollarë, nga 33 miliardë sa ishte buxheti fillestar. Aktualisht, po ndërtohet një segment i vogël që pritet të hapet në fillim të viteve 2030, ndërsa lidhja e plotë është planifikuar për vitin 2038.
Përveç sfidave infrastrukturore, administrata Trump ka propozuar shkurtime prej 82% në buxhetin federal për infrastrukturën e trenave të pasagjerëve për vitin fiskal 2027. Amtrak vlerëson se do t'i duheshin mbi 100 miliardë dollarë dhe më shumë se 15 vjet për të përmirësuar korridorin verilindor, përfshirë sistemet e sinjalizimit, tunelet dhe urat.
Burimi: dw.com