Procesi i shkarkimit (impeachment) ndaj zëvendëspresidentes së Filipineve, Sara Duterte, ka filluar të hënën në orën 14:00 (06:00 GMT). Ajo përballet me akuza për shkelje të kushtetutës dhe tradhti të besimit publik, të cilat përfshijnë keqpërdorimin e fondeve konfidenciale qeveritare, mosdeklarimin e pasurisë, ryshfetin dhe kërcënimet me vdekje ndaj Presidentit Ferdinand Marcos Jr., bashkëshortes së tij Liza Araneta dhe ish-kryetarit të Kuvendit, Martin Romualdez.
Një nga pretendimet kryesore në ankesën kundër zëvendëspresidentes lidhet me transaksione bankare private prej më shumë se 110 milionë dollarësh, të cilat janë shënuar nga agjencia kundër pastrimit të parave. Sara Duterte, e cila është vajza e ish-presidentit Rodrigo Duterte, i ka mohuar akuzat dhe ka insistuar se procesi është i motivuar politikisht.
Pak para fillimit të gjykimit, senatori Rodante Marcoleta, një aleat i Duterte-s, u arrestua nën akuzën e përvetësimit të paligjshëm (plunder). Arrestimi i tij, i urdhëruar nga gjykata antikorrupsion Sandiganbayan, ka ngritur dyshime mbi mbështetjen që Duterte mund të gëzojë në Senat. Marcoleta ishte planifikuar të shërbente si senator-gjykatës në këtë proces.
Nëse shpallet fajtore për ndonjërën nga akuzat, ajo do të shkarkohet nga detyra, ndërsa Senati mund ta ndalojë përgjithmonë nga mbajtja e posteve publike. Një dënim i tillë do ta pengonte atë të kandidonte për presidente në zgjedhjet e vitit 2028.
Për një dënim kërkohet shumica prej dy të tretave në Senatin me 24 anëtarë. Për shkak të tensioneve të larta politike, më shumë se 6,000 oficerë policie dhe njësi të kontrollit të trazirave janë angazhuar për të siguruar ambientet e Senatit. Procesi pritet të zgjasë për disa muaj.
Burimi: aljazeera.com