Departamenti i Drejtësisë i SHBA-së ka njoftuar se ka nisur një shqyrtim për të përcaktuar nëse programet e ndihmës financiare të Universitetit Harvard, të mbështetura nga burime kineze, përjashtojnë studentët amerikanë. Në një deklaratë zyrtare, Divizioni i të Drejtave Civile bëri të ditur se po heton nëse praktikat e universitetit në këtë fushë diskriminojnë qytetarët amerikanë.
Universiteti Harvard ka reaguar duke deklaruar se institucioni “nuk diskriminon në mënyrë të paligjshme mbi bazën e racës, etnisë apo origjinës kombëtare në shpërndarjen e ndihmës financiare”. Një zëdhënës i universitetit me seli në Cambridge, Massachusetts, konfirmoi se po shqyrtojnë letrën e fundit të Departamentit të Drejtësisë dhe se do të bashkëpunojnë me qeverinë për këtë çështje.
Harvardi ka deklaruar më parë se ka dorëzuar raporte të tilla për dekada me radhë, si pjesë e përputhshmërisë së vazhdueshme me ligjin. Megjithatë, një marrëveshje për të zgjidhur hetimet më të gjera të administratës së presidentit Donald Trump ndaj universitetit mbetet ende e paqartë.
Sipas autoriteteve, kjo mund të çojë në ofrimin e ndihmës financiare për studentët e huaj, me gjasë kinezë, në bazë të origjinës së tyre kombëtare, duke dëmtuar potencialisht studentët e tjerë, përfshirë qytetarët amerikanë.
Ky hetim është pjesë e një serie masash të administratës Trump ndaj universiteteve elitare, të cilat kanë përfshirë kërcënime për pezullimin e fondeve federale. Këto masa lidhen me çështje të ndryshme, duke përfshirë protestat mbi luftën në Gaza, iniciativat për diversitetin, politikat për personat transgjinorë dhe programet klimatike. Muajin e kaluar, një gjykatës federal bllokoi një plan të administratës për të ndaluar hyrjen në SHBA të shtetasve të huaj që synonin të studionin në Harvard.
Burimi: timesofisrael.com