Chris Fall, drejtuesi i Qendrës për Standarde dhe Inovacion në AI (CAISI) në administratën Trump, ka dhënë dorëheqjen nga posti i tij. Siç raporton Axios, Fall ka qëndruar në këtë detyrë për vetëm tre muaj, pas emërimit të tij në prill të vitit 2026. Deri në këto momente, nuk është bërë i ditur asnjë shkak për largimin e tij nga agjencia.
Arvind Raman, i cili aktualisht drejton zyrën e Departamentit të Tregtisë që mbikëqyr institutin e testimit të AI-së, pritet të marrë përkohësisht drejtimin e CAISI-t.
Para dorëheqjes, Fall ishte përgjegjës për bashkëpunimin me laboratorët kryesorë amerikanë të inteligjencës artificiale, si Anthropic, DeepMind i Google, OpenAI, Microsoft dhe xAI i Elon Musk. Detyra e tij përfshinte testimin e modeleve të tyre të avancuara dhe atyre ende të papublikuara, për të identifikuar cenueshmëritë dhe për të parandaluar keqpërdorimin e tyre.
Administrata Trump i ka dhënë përparësi zhvillimit të AI-së, duke e konsideruar atë si një pjesë kyçe të ekonomisë dhe sigurisë së Shteteve të Bashkuara. Administrata ka ndjekur një qasje direkte, duke kërkuar nga kontraktorët qasje të pakufizuar në sistemet e tyre.
Në kuadër të kësaj strategjie, Trump ka kërkuar që kompanitë e AI-së të ofrojnë aksione në pronësinë e tyre, me pretendimin se kjo do të krijojë një partneritet me publikun amerikan. Nga ana tjetër, senatori Bernie Sanders ka propozuar krijimin e një fondi sovran për AI, ku 50% e aksioneve të kompanive të këtij sektori do të përdoreshin për të financuar infrastrukturën dhe projekte të ndryshme për qytetarët.
Burimi: techradar.com