Një koalicion i përbërë nga kompanitë Eversource, National Grid, EnergyHub, Sunrun dhe Mobility House ka nisur një testim të hershëm të teknologjisë “vehicle-to-grid” (V2G) në Massachusetts. Ky projekt u mundëson klientëve të shërbimeve energjetike të përdorin bateritë e automjeteve të tyre elektrike për të dërguar energji mbrapa në rrjet, veçanërisht në periudhat kur kërkesa për energji rritet ndjeshëm.
Gjatë ngjarjeve të kërkesës së lartë, siç janë valët e të nxehtit, bateritë e automjeteve mund të ndihmojnë rrjetin të përballojë ngarkesën. Pjesëmarrësit në këtë program kompensohen për energjinë e dhënë, në mënyrë të ngjashme me pronarët e paneleve diellore që furnizojnë rrjetin.
Sipas tij, mësimet e nxjerra nga ky testim do të jenë thelbësore për shkallëzimin e teknologjisë në të ardhmen. Nga ana tjetër, Russell Vare, zëvendëspresident i Mobility House North America, theksoi se bateritë e automjeteve përfaqësojnë një burim të lirë dhe efikas për ruajtjen fleksibël të energjisë, duke ndihmuar kompanitë energjetike të përballojnë sfidat e rritjes së kërkesës nga qendrat e të dhënave dhe kalimit drejt burimeve të ripërtëritshme.
Përkundër faktit se jo të gjitha automjetet elektrike posedojnë pajisjet e nevojshme për V2G, modele si Nissan Leaf janë të pajisura për këtë funksion. Seth Frader-Thompson, president i EnergyHub, deklaroi se me uljen e kostove të pajisjeve dhe avancimin e standardeve, teknologjia V2G pritet të bëhet më e arritshme në vitet e ardhshme.
Projekti synon të koordinojë përdorimin e këtyre baterive përmes aplikacioneve, duke lejuar pronarët të specifikojnë oraret e tyre të lëvizjes. Kjo qasje mundëson që automjetet të dërgojnë energji në rrjet kur kërkesa është më e lartë, ndërsa procesi i karikimit të tyre të zhvillohet në orët e natës, duke shmangur mbingarkesën e rrjetit.
Burimi: wired.com