Bordi i Radio Televizionit të Kosovës ka shpallur konkursin për drejtorin e përgjithshëm të këtij institucioni.
Kështu kanë njoftuar nëpërmjet një komunikate për media, përcjell Paparaci.
Në këtë komunikatë shkruhet se procesi i konkursit do të jetë i bazuar në meritokraci, i hapur për monitorim dhe publik për të gjithë kandidatët e interesuar.
“Konkursi për Drejtor të Përgjithshëm të RTK-së do të jetë publik dhe i hapur për të gjithë kandidatët që janë të interesuar dhe plotësojnë kriteret, përderisa si proces do të jetë tërësisht i bazuar në meritokraci dhe do të jetë i hapur për monitorim. Rrjedhimisht, inkurajojmë të gjithë të interesuarit që këto ditë të përcjellin hapjen e konkursit në kanalet e RTK-së dhe të aplikojnë për pozitën në fjalë”, thuhet në komunikatë.
Po ashtu, sipas komunikatës Bordi i RTK-së ka pritur në takim përfaqësuesit e Sindikatës së Pavarur të RTK-së (SPRTK), më të cilët është diskutuar lidhur me sfidat, shqetësimet dhe kërkesat e tyre.
“Bordi i RTK-së siguroi SPRTK-në se do t’i adresojë shqetësimet e tyre në përputhje me rregullativën e RTK-së dhe ofroi bashkëpunim të plotë në funksion të zhvillimit të RTK-së”, thuhet në fund.
Dy javë më parë është shkarkuar drejtori Ngadhnjim Kastrati.
“Vendimi për shkarkim bazohet në shkeljet e shumta të Ligjit për RTK-në dhe akteve tjera nënligjore të bëra në RTK gjatë mandatit të z. Kastrati. Bordi i RTK-së konstatoi neglizhencë të Drejtorit të Përgjithshëm ndaj parregullsive, keqpërdorimeve, mospunës, nepotizmit, degradimit, raportimit të vazhdueshëm të anshëm e jo objektiv të transmetuesit publik të Kosovës. Bazuar në të gjitha këto shkelje, për Bordin e RTK-së ka qenë e pamundur vazhdimi i konsolidimit të reputacionit të RTK-së dhe funksionimit të tij me z.Kastrati si Drejtor i Përgjithshëm”, thuhet në njoftim.