Kryeministri i Kosovës, Albin Kurti, në rihapjen e terminalit doganor të Trepçës në Mitrovicë, ka thënë se terminali është rikthyer aty ku e ka vendin.
Tutje ai ka shtuar se rihapja e këtij terminali e ndihmon Kosovën, Trepçën por dhe zhvillimin e biznesit.
“Është një e arritur që na ndihmon të gjithëve edhe shtetin e Kosovën e Trepçën edhe doganat, por në veçanti ndihmon të bërit biznes. Për bizneset një kosto e panevojshme hiqet dhe në këtë mënyrë ato do të mund të funksionojnë më lirë e më mirë edhe për të mirën e tyre, por edhe të qytetarëve të vendit. Nga viti 2003 deri në 2014, terminali doganor ka qenë në hapësirën e Trepçës”, ka thënë Kurti.
“7 vjet më vonë ne po e bëjmë këtë hapje të terminalit doganor në hapësirën e Trepçës dhe po e rikthejmë në Trepçë atë që gjithmonë i ka takuar dhe po e korrigjojmë një dëm të bërë para 7 vitesh. Asokohe, 24 punëtorë kanë punuar në terminalin doganor dhe ata automatikisht patën ngelur pa punë atëherë kur e patën nxjerrë jashtë kësaj hapësire terminalin doganor”, ka shtuar ai.