Kancelari i Gjermanisë, Olaf Scholz, do t’i presë në takim kryeministrin e Kosovës, Albin Kurti dhe presidentin serb, Aleksandar Vuçiq. I pranishëm do të jetë edhe emisari i BE-së për dialog, Miroslav Lajçak.
Takimi do të zhvillohet në Berlin, të mërkurën e ardhshme.
Lajmi u bë i ditur në një komunikatë për media nga qeveria Federale e Gjermanisë.
“Kancelari Scholz do të pret në takim kryeministrin e Republikës së Kosovës, Albin Kurti dhe presidentin serb Aleksandar Vuçiq”, tha një zëdhënës i kësaj qeverie.
“Bisedimet shërbejnë gjithashtu për të mbështetur dialogun Kosovë-Serbi të udhëhequr nga BE-ja. Për këtë, Kancelari Federali ka ftuar në Berlin të dërguarin e posaçëm të BE-së, Miroslav Lajčák, i cili në mbrëmje do të zhvillojë bisedime me Kurtin dhe Vuçiqin”, thuhet në kumtesën e qeverisë gjermane.
Takimet do të jenë të ndara.
Kurti dhe Scholz, sipas njoftimit, do të takohen në ora 15:00.
Ndërkaq, takimi mes kancelarit gjerman dhe Vuçiqit është planifikuar të mbahet në ora 17:30.