Trajneri i skuadrës së Manchester City, Pep Guardiola, ka komentuar eliminimin nga Liga e Kampionëve pas humbjes nga Real Madridi me rezultat 3:1.
Edhe pse City kishte epërsinë në ndeshjen e parë dhe pothuajse deri në fund të ndeshjes së dytë, Reali bëri një rikthim fantastik për të siguruar finalen e madhe.
Guardiola është shprehur i dëshpëruar me eliminimin, mirëpo e pranon se ai nuk ishte i sigurt për kualifikimin e skuadrës së tij edhe pas 89 minutave.
“Në pjesën e parë nuk e gjetëm lojën tonë, por më pas lojën e bëmë ne. Më pas, në minutën e 90-të Real Madridi e gjeti golin e parë, e më pas edhe të dytin… Nuk ishim duke vuajtur, por ata e gjetën golin dhe ua uroj. As në minutën e 89-të nuk e shihja veten në finale pasi e njoh Bernabeun. E kishim mundësinë ta shënonim edhe golin e dytë, por ajo që ka ndodhur në Manchester ndodhi përsëri sot. Tash në finale janë Liverpooli e Real Madridi dhe ne do të kalojmë ditë të rënda”, deklaroi Guardiola për “TNT SPorts”.
Ndërkohë, “Citizens” do të mundohen ta mbrojnë titullin e kampionit në Angli, ku janë liderë të Premierligës, me një pikë më shumë se përcjellësi kryesor, Liverpool.