Facebook prezanton programin e verifikimit të fakteve nga palët e treta në Shqipëri.
“Si pjesë e luftës së Facebook kundër keqinformimit, ne bashkëpunojmë në të gjithë botën me verifikues të pavarur të fakteve me palë të treta, të cilat shqyrtojnë dhe vlerësojnë saktësinë e përmbajtjes. Sot ne prezantojmë nisjen e programit të verifikimit të fakteve në Shqipëri me organizatën e pavarur të verifikimit të fakteve Faktoje, një media e certifikuar nga rrjeti ndërkombëtar IFCN, i cili është i pavarur, jopartiak dhe transparent”, thuhet në njoftimin për shtyp.
Konkretisht, kur një gazetar që verifikon faktet vlerëson një histori si të rreme, Facebook e shfaq më pak atë në News Feed, duke ulur ndjeshëm shpërndarjen e saj.
Kjo ndalon përhapjen e lajmeve të rreme dhe zvogëlon numrin e njerëzve që e shohin atë.
“Faqet dhe domenet që shpërndajnë vazhdimisht lajme të rreme do të shohin gjithashtu uljen e shpërndarjes së tyre dhe heqjen e aftësisë për të fituar para dhe reklamim. Dhe kur një postim është shënuar si i rremë, ne paralajmërojmë njerëzit që e shohin postimin ose përpiqen ta ndajnë postimin, që është shënuar si i rremë. Kontrolluesit e fakteve nuk heqin llogaritë ose faqet nga Facebook”, vijon më tej njoftimi për shtyp.
“Ne jemi të lumtur që nisim programin tonë të kontrollit të fakteve të palëve të treta në Shqipëri me organizatën e verifikimit të fakteve, ‘Faktoje’. Lufta kundër lajmeve të rreme është një përgjegjësi që ne e marrim seriozisht, prandaj po punojmë vazhdimisht për mënyrat që ndihmojnë ndalimin e përhapjes së tyre në platformën tonë”, tha Kateryna Kruk, menaxhere e Politikave Publike për Shqipërinë.
“Ne jemi duke punuar vazhdimisht për mënyrat që ndihmojnë ndalimin e përhapjes së lajmeve të rreme në platformën tonë dhe për të kuptuar vlerën e partneritetit me ekspertë vendas për ta realizuar këtë. Ne jemi të kënaqur që fillojmë të punojmë me Faktoje dhe i mirëpresim ata në programin tonë global,” tha Sophie Eyears, menaxhere e Zhvillimit të Partnerëve Strategjik, Integriteti i Lajmeve në Meta.
Ky program është në përputhje me kornizën trepjesëshe të Facebook për të përmirësuar cilësinë dhe autenticitetin e postimeve në News Feed, ku Facebook heq llogaritë dhe përmbajtjet që shkelin standardet e tij të komunitetit ose politikat e reklamave; redukton shpërndarjen e lajmeve të rreme dhe përmbajtjeve jo autentike si klikimi; dhe informon njerëzit duke u dhënë atyre më shumë kontekst për postimet që shohin.
“Ne jemi të lumtur, që më në fund edhe Shqipëria, përmes ‘Faktoje’ u bë pjesë e këtij partnership me Facebookun. Misioni ynë është të luftojmë disinformimin, të informojmë me fakte, dhe të tregojmë qartë se cilat janë lajmet e rreme që helmojnë çdo ditë nga pak jetën tonë. Ky partnership, është një fillim i ri për ne, dhe jemi të lumtur që prej ditës së sotme jemi pjesë e këtij programi global”, – tha Klodiana Kapo, drejtore ekzekutive e Faktoje në Shqipëri.
“Faktoje do të fillojë verifikimin e fakteve në Facebook dhe Instagram në ditët në vijim. Sot, ne punojmë me më shumë se 80 partnerë për verifikimin e fakteve në më shumë se 60 gjuhë në mbarë botën dhe po investojmë në mënyra për t’i shkallëzuar më tej këto përpjekje”, thuhet më tej në njoftim.