Ka përfunduar aksioni “Brezovica 6”, i cili kishte nisur sot në orët e hershme të mëngjesit në disa lagje të Prishtinës, shkruan Paparaci.
Kështu ka bërë të ditur për Paparacin, prokurori i rasti Rasim Maloku.
Shtatë persona janë arrestuar mëngjesin e sotëm në kuadër të aksionit “Brezovica” të Prokurorisë së Ferizajt.
Në mesin e të arrestuarave në rastin Brezovica, është edhe asamblisti i VV-së, Berat Lahu.
Lahu që është edhe dhëndër i Liburn Aliut, po dyshohet për ushtrim ndikimi.
Ndërsa, tre nga shtatë të arrestuarit në aksionin e Brezovicës janë zyrtarë të Ministrisë së Mjedisit dhe Planifikimit Hapësinor.
Aksioni është zhvilluar në 11 lokacione në Prishtinë, Fushë Kosovë dhe Podujevë.
Ndaj tyre është caktuar masa e ndalimit prej 48 orësh.
Ndryshe, aksioni “Brezovica”, filloi më 21 dhjetor 2021 dhe është i udhëhequr nga prokurori Rasim Maloku nga Prokuroria Themelore në Ferizaj, në koordinim me Policinë e Kosovës -Drejtorinë e Krimeve të Rënda në Prishtinë, të cilët kanë zhvilluar këtë aksion në Komunën e Shtërpcës.
Fillimisht në këtë aksion, me urdhër të prokurorit, janë arrestuar dhjetë persona të dyshuar, ndërsa në mesin e tyre edhe ish-kryetari i Komunës së Shtërpcës, drejtori i Urbanizmit, disa zyrtarë të tjerë dhe disa pronarë të firmave, për shkak të dyshimit për veprat penale “Marrja e ryshfetit”, “Dhënia e ryshfetit” dhe “Keqpërdorimi i pozitës apo autoritetit zyrtar” të Kodit Penal të Republikës së Kosovës (KPRK). Paparaci.com.