Këshilli Prokurorial i Kosovës ia ka ndaluar ekipit të Paparaci.com të marrë pjesë fizikisht në mbledhjen e KPK-së të premten.
Që nga koha e pandemisë COVID-19, më 2020, KPK-ja vazhdon t’i mbajë mbledhjet pa prezencën fizike të gazetarëve dhe shoqërisë civile. Deri para disa muajsh, mbledhjet janë mbajtur online me arsyetimin e zbatimit të masave kundër COVID-19.
Megjithatë, masat anti-COVID janë lehtësuar gati një vit më parë. KPK-ja mbetet i vetmi institucion i cili mbledhjet e saj i transmeton online, por nuk i lejon gazetarët të jenë fizikisht pjesëmarrës në takime.
Ngjashëm ka ndodhur edhe të premten e 23 dhjetorit, kur ekipi i Paparaci.com nuk është lejuar të marrë pjesë fizikisht në mbledhje.
Pjesëtarë të stafit administrativ të Këshillit Prokurorial i kanë thënë ekipit të Paparaci.com se mbledhjet e këshillit mbahen vetëm përmes formës online dhe se asnjë gazetar nuk lejohet të marrë pjesë fizikisht në mbledhje. Ata i kanë ofruar qasje ekipit të Paparaci.com që mbledhjen ta përcjellë vetëm përmes formës online.
Aktualisht, kryesues i Këshillit Prokurorial të Kosovës është Jetish Maloku. Ai, që nga zgjedhja në krye të këtij këshilli, ishte deklaruar për transparencë dhe llogaridhënie para publikut. Deri sot, zotimi i tij ka dështuar keq. /Paparaci.com