Policia e Kosovës ka dalë me njoftim zyrtar pasi disa kamionë me të cilët ishte bllokuar rruga në lokacionin e njohur si Shkëmbi i Dudës në Mitrovicë të Veriut janë djegur gjatë natës.
Sipas Policisë, dy kamionë janë djegur në mëngjesin e hershëm të cilët kanë qenë të vendosur në barrikadë në atë pjesë.
“Përveç dëmeve materiale nuk raportohet për lëndime, përderisa rasti është duke u hetuar”, njoftoi Policia.
Largimi i barrikadave ishte paralajmëruar të nisë sot në orët e mëngjesit, por mëngjesin e së enjtes dy kamionët e vendosur tek vendi i quajtur “Kërshi i Dudës” janë parë të djegur.
Vendosja e barrikadave nga grupe kriminale serbe u bë pas arrestimit të ish policit Dejan Pantiq, i dyshuar për sulm ndaj institucioneve të Kosovës, saktësisht zyrave të KQZ në veri të vendit.
Më shumë se 10 barrikada të vendosura nga këto grupe penguan qarkullimin e lirë të njerëzve, ndërkaq edhe reagimi ndërkombëtar në këtë drejtim ishte i dobët.