Kryeministri i Republikës së Kosovës, Albin Kurti ka udhëtuar sot për në Zvicër për të marrë pjesë në Forumin Ekonomik Botëror në Davos.
Shefi i ekzekutivit ka udhëtuar drejt Zvicrës, i shoqëruar nga katër zyrtarë të tjerë qeveritarë, përfshirë edhe ministren e Ekonomisë, Artane Rizvanolli, ka njoftuar zyra për media e Qeverisë së Kosovës.
“Ndërkaq, në ditën e parë të qëndrimit në Zvicër, Kryeministri Kurti, së bashku me Ministren e Ekonomisë, Artane Rizvanolli, Shefin e Stafit, Luan Dalipi, Këshilltarin Politik për Teknologji të Informacionit, Lulëzon Jagxhiu dhe Këshilltaren politike të ministrit të Mjedisit, Planifikimit Hapësinor dhe Infrastrukturës, Gearda Demiraj do të jenë folës në Samitin e Investitorëve në Cyrih (Zürich), të organizuar nga Qeveria e Kosovës”, ka njoftuar qeveria.
Forumi i Davosit është një ngjarje e cila organizohet çdo vit dhe në të marrin pjesë liderë shtetërorë nga e gjithë bota.