Maqedonia e Veriut dhe Shqipëria kanë bërë shumë sakrifica dhe meritojnë të avancojnë në procesin e anëtarësimit në Bashkimin Evropian, deklaroi i dërguari i SHBA-së për Ballkanin Perëndimor, Gabriel Escobar, në një seancë dëgjimore në Nënkomitetin për Evropën dhe Bashkëpunimin për Sigurinë Rajonale.
”Një Evropë e plotë, e lirë mbetet në interesin jetik të Shteteve të Bashkuara të Amerikës dhe në thelb të politikës sonë. Ballkani është thelbësor për këtë vizion”, theksoi ai.
”Administrata e presidentit Bidenit, duke e njohur këtë sfidë, mbetet e përkushtuar ndaj rajonit që është pjesë e pandashme e Evropës. Angazhimet tona diplomatike të gjata mbështesin integrimin e plotë të Ballkanit Perëndimor në strukturat euroatlantike. Një Ballkan i fortë i integruar në një Evropë të fortë do të thotë një komunitet i fortë transatlantik”, tha Escobar.
”Shtetet e Bashkuara të Amerikës vazhdojnë të thellojnë partneritetet tona në rajon. Në muajt e fundit ne festuam 140-vjetorin e marrëdhënieve diplomatike me Serbinë dhe mbajtëm konsultimet tona të para dypalëshe në pesë vjet. Ne shpallëm një seli të operacioneve speciale bazë në Shqipëri, mirëpritëm Kroacinë në programin e heqjes së vizave dhe u mbështetëm shumë te partnerët tanë në Kosovë, Shqipëri dhe Maqedoninë e Veriut në një orë nevoje për të pritur mijëra të evakuuar afganë”, shtoi ai.
”Ne mbështesim fuqishëm dialogun e lehtësuar nga BE-ja për normalizimin e marrëdhënieve ndërmjet Kosovës dhe Serbisë. Dialogu është platforma në të cilën të dyja palët si të barabarta duhet të përfshihen për të zgjidhur mosmarrëveshjet e tyre dhe për të gjetur një marrëveshje gjithëpërfshirëse. Ne besojmë se kjo përpjekje duhet të bazohet në njohjen reciproke. Maqedonia e Veriut dhe Shqipëria kanë bërë shumë sakrifica dhe meritojnë të avancojnë në procesin e anëtarësimit në BE”, tha Escobar.