31 deputetë të shumicës qeverisëse kanë votuar pro themelimit të Komisionit Hetimor për rezervat shtetërore, pavarësisht prej kundërshtimit të zëshëm të Mimoza Kusari-Lilës, shefes së Grupit Parlamentar të LVV-së.
Madje, në votimin e nismës së LDK-së për krijimin e Komisionit Hetimor Parlamentar, edhe Kusari-Lila ka votuar pro propozimit.
Në një votim të mbajtur pas një debati të gjatë, 69 deputetë votuan pro themelimit të komisionit parlamentar i cili synon të hetojë dyshimet për keqpërdorimin e rezervave shtetërore.
31 deputetë të pushtetit qeverisës votuan pro, gjashtë abstenuan ndërkaq një, deputeti Dimal Basha, votoi kundër.
“75 deputetë paskan marrë pjesë në votim. Për themelimin e komisionit janë 69 deputetë, kundër një dhe gjashtë abstenime. Konstatoj se kuvendi e themeloi Komisionin Hetimor Parlamentar”, tha kryetari i kuvendit Glauk Konjufca.
Paraprakisht, gjatë debatit në kuvend, partitë opozitare dhe partia në pushtet u përplasën në lidhje me themelimin e komisionit hetimor parlamentar për rezervat shtetërore.
Sipas partive opozitare, nevoja për themelimin e këtij komisioni është e domosdoshme pasi ka dyshime të bazuara për abuzime me rezervat shtetërore, ndërkaq në LVV theksuan se kjo është ndërhyrje në sistemin e drejtësisë, pasi prokuroria veçse është duke hetuar këtë rast.