Forma e tij e mirë e titulli si gjyqtari më i mirë në Kosovë nuk i jep përparësi ndaj kolegëve tjerë gjyqtarit Genc Nuza. Madje, për shkak të fatit jo të mirë, Nuza nuk ka ndarë drejtësinë në Superligën e Kosovës për tash e katër xhiro.
Për shkak të formatit të ri të delegimit të gjyqtarëve nga Federata e Futbollit të Kosovës, Nuza nuk ka arritur t’i tregojë aftësitë e tij në fushë.
Gjyqtari më i mirë në Kosovë nuk ka gjykuar asnjë ndeshje futbolli në Superligën e Kosovës që nga java e tetë. Për fat të mirë, Nuza ka pranuar sot delegimin pas katër xhirove jashtë fushës së blertë.
Ai është deleguar për të ndarë drejtësinë në ndeshjen e javës së 13-të të Superligës së Kosovës, në takimin mes Dukagjinit e Dritës që do të zhvillohet të dielën në stadiumin “18 qershori” në Drenas.
Ndeshja e fundit që kishte gjykuar Nuza ishte zhvilluar një muaj më parë, saktësisht më 2 tetor. Nuza kishte ndarë drejtësinë në takimin mes Fushë Kosovës e Prishtinës, që përfundoi me barazim, 2:2.
Që nga 2 tetori, Nuza ishte deleguar vetëm si gjyqtar i katërt, ose në të shumtën e rasteve ai kishte mbetur në kombin e “VAR”-it.
Gjyqtarët kosovarë nuk kanë pranuar asnjëherë të deklarohen lidhur me formën e re të delegimit, ndonëse pas kamerave kanë shprehur pakënaqësitë e tyre lidhur me këtë formë.
Federata e Futbollit e Kosovës është e vetmja federatë që aplikon këtë mënyrë për delegimin e gjyqtarëve.
Madje një formë e tillë e delegimit është e ndaluar me konventën e gjyqtarëve.