Shtetet e Bashkuara të Amerikës nuk e njoftuan paraprakisht qeverinë irakiane për sulmet në vend të premten, tha të hënën një zëdhënës i Departamentit të Shtetit.
Kjo bie ndesh me një koment të mëparshëm nga Shtëpia e Bardhë që thoshte se irakianët ishin informuar para kohe, shkruan CNN.
Një zëdhënës i Këshillit të Sigurisë Kombëtare ka sqaruar që atëherë këto komente, duke thënë se ShBA u tha irakenëve në përgjithësi se ajo do t’i përgjigjej një sulmi me dron më 28 janar që vrau pjesëtarë të shërbimit amerikan.
“Sa i përket kësaj përgjigjeje specifike të premten, nuk ka pasur një njoftim paraprak. Ne informuam irakianët menjëherë pasi ndodhën sulmet”, tha zëvendës zëdhënësi i Departamentit të Shtetit, Vedant Patel në konferencën e së hënës.
Zëdhënësi i Pentagonit, gjeneral major, Pat Ryder, nuk iu drejtua drejtpërdrejt llogarive kontradiktore nëse qeveria irakiane ishte njoftuar përpara sulmeve të ShBA-së, duke thënë vetëm se ata janë “një partner me vlerë”.
Të premten, zëdhënësi i Këshillit të Sigurisë Kombëtare, John Kirby, u tha gazetarëve se ShBA “ka informuar qeverinë irakiane përpara sulmeve”.
Një tjetër zëdhënës i NSC tha më vonë për CNN se Kirby do të thoshte se Iraku e kuptonte se do të kishte një përgjigje.
“Për sigurinë operacionale, ne nuk kemi dhënë asnjë lloj paranjoftimi zyrtar me detaje specifike për këto sulme”, tha zëdhënësi i NSC.
“U përgjigja me informacionin që më kishin dhënë në atë kohë. Nuk ishte aq specifike sa mund të ishte dhe më vjen keq për çdo konfuzion të shkaktuar”, tha në një deklaratë të veçantë të hënën Kirby.