Ministrja në detyrë, Donika Gërvalla, ka thënë se Lëvizja Vetëvendosje është munduar të gjej zgjidhje për të zhbllokuar institucionet, por që sipas saj propozimet e LVV-së nuk janë mbështetur nga opozita.
Pas dështimit të konstituimit të Kuvendit për të 13-të herë me radhë, Gërvalla ka thënë se nuk do të heqin dorë nga propozimet e tyre.
Sipas Gërvallës opozita është ajo që po e bllokon formimin e institucioneve.
“Nuk ka asnjë arsye për ta vazhduar bllokadën, mundësitë ishin për ta zhbllokuar por nuk u shfrytëzuan. Ne në vazhdimësi jemi përpjekur të përçojmë sinjale që jemi të përkushtuar për konstituimin e Kuvendit, mirëpo deri më tani nuk kemi asnjë progres në këtë fushë. Keni qenë dëshmitarë të letrës së Kurtit, kurse kemi marrë një propozim absurd që ta kujton kohën e vitit 99 me propozimin për qeveri tranzitore. Dje më qartë se kurrë u pa se kush qëndron në cilën anë. Nuk kemi kohë për të humbur, nuk është momenti”, ka thënë Gërvalla.