Gazetari Vehbi Kajtazi ka ngritur një sërë dyshimesh në lidhje me raportin e veprimeve të kryeministrit në detyrë, Albin Kurti me përfitimet politike të presidentit serb, Aleksandar Vuçiq.
Në “VV Show”, Kajtazi sugjeroi se tensionet e përsëritura në veri të Kosovës mund të jenë në shërbim të ndërsjellë të të dy liderëve.
“Nuk është e rastësishme, sa herë që është në krizë Vuçiqi, Kurti nis një problem një diçka në veri të Kosovës e cila pastaj e kthen vëmendjen këtu. Kjo mua më bën më besu se ky njeri është duke i ndihmu Vuçiqit me qëndru në pushtet”, deklaroi ai.
Sipas Kajtazit, kjo marrëdhënie joformale nuk është e re.
Ai përmendi rastet kur zyrtarë të lartë serbë, përfshirë presidentin Vuçiq dhe ambasadorin e Serbisë në OKB, kanë dalë publikisht kundër Kurtit, gjë që, sipas tij, në praktikë ka ndikuar në favor të tij politikisht.
“Sepse edhe Vuçiqi i ka ndihmu Albin Kurtit. Kur ka fol ambasadori i Serbisë në OKB dhe i ka bë thirrje shqiptarëve mos e votoni Albin Kurtin, ajo në fakt është thirrje votojeni Albin Kurtin. Dhe këtë e ka thënë edhe presidenti i Serbisë që të mos votohet Kurti, dhe kjo është thirrje për me votu. Këta dy po e mbajnë njëri-tjetrin”, shtoi ai.
“A mos po argumentohen ato akuzat e Ramush Haradinajt, që Kurti është agjent i Serbisë? Punon për Serbinë?”.