Kancelari i Gjermanisë, Friedrich Merz, deklaroi se përparësia kryesore e tij është nxjerrja e Gjermanisë nga recesioni dhe forcimi i mbrojtjes evropiane.
Duke folur me gazetarët në konferencën tradicionale verore të kancelarit të premten, udhëheqësi gjerman kritikoi ashpër Bashkimin Evropian, të cilin e cilësoi si “shumë të ngarkuar me rregulla, shumë burokratik dhe shumë të ngadaltë” për të zgjidhur problemet e qytetarëve të tij.
Ai theksoi gjithashtu se çështja e migracionit duhet të trajtohet me urgjencë.
Merz tha se Gjermania po kontrollon kufirin e saj me Poloninë, ndërsa Polonia, nga ana tjetër, po forcon mbrojtjen përgjatë kufirit me Lituaninë.
Ai akuzoi Rusinë dhe Bjellorusinë për dërgimin e emigrantëve drejt Evropës.
Kancelari nënvizoi marrëdhënien e tij të ngushtë me liderët evropianë Emmanuel Macron, Donald Tusk dhe Keir Starmer, si dhe tha se ka punuar intensivisht me partnerët amerikanë për të gjetur zgjidhje për politikat tregtare të Presidentit të SHBA-së, Donald Trump, si edhe për situatën në Izrael dhe Gaza.
“Ne duam të përpiqemi të ndihmojmë”, tha Merz, duke iu referuar përkeqësimit të situatës humanitare në Rripin e Gazës. Ai shtoi se qeveria e tij po punon për të sjellë ndihmë humanitare në zonë.
Merz deklaroi se Izraeli nuk mund të krahasohet me Rusinë, pasi të dyja vendet janë “thelbësisht të ndryshme”, duke shtuar se Izraeli mbetet një demokraci.
Duke ruajtur një ton diplomatik, ai refuzoi të kritikonte drejtpërdrejt politikën e migracionit të Angela Merkelit të vitit 2015, të njohur për shprehjen “Wir schaffen das” (“Ne do ta menaxhojmë këtë”), dhe u shpreh se qeveria aktuale është në rrugën e duhur për ta “korrigjuar” atë.
Ai përmendi 81 deportimet e shtetasve afganë që u kthyen në Afganistan të premten, duke shtuar se Katari ka luajtur një rol në lehtësimin e këtij procesi. “Qeveria Federale nuk e njeh qeverinë de facto të talebanëve,” theksoi Merz, duke shtuar se nuk pritet ndryshim i qëndrimit në këtë drejtim.
Komentet e Merz-it shënuan një ndryshim tonal nga qeveria e mëparshme, ndërsa ai u përpoq të gjejë një ekuilibër midis idealeve socialiste dhe konservatore brenda koalicionit qeverisës.
Gjermania po përballet me sfida të dyfishta: të bëhet më produktive dhe më konkurruese – çështje që pritet të përcaktojnë drejtimin e udhëheqjes së Merz për katër vitet e ardhshme.