Viti 2022 në Evropë është një vit, i cili do t’i kushtohet tërësisht rinisë me shpalljen e tij si të tillë, ku Tirana ka marrë edhe stafetën si kryeqyteti i rinisë evropiane, me mijëra aktivitete, të cilat presin të vënë në lëvizje jetën kryeqytetase vendore si edhe atë jashtë kufijve.
Shqipëria gjithsesi nuk është thjesht kryeqytet i rinisë evropiane në mënyrë simbolike, por edhe faktike.
Në raportin e fillim vitit nga agjencia evropiane e statistikave, Eurostat, Shqipëria shfaqet si vendi me më shumë të rinj së bashku me Turqinë. Respektivisht, mbi 20% e popullatës, i përket moshës 15-29 vjeç.
Në ndërkohë, mesatarja e Bashkimit Evropian ndalet në 16%.
E ndarë në tre rajone, veri, Shqipëri e Mesme, jug, të tre zonat demografike përfshihen në “listën rinore” nga Eurostat.
Po e njëjta gjë ndodh edhe me Turqinë dhe gjithë ndarjet e saj të shumta gjeografike.
Ndërsa, pjesa tjetër e rajonit, është kryesisht në rendin e 15-18% të popullatës në grup moshën 15-29 vjeç.
Kosova është ndër të renditurat poshtë në rajon, me 16-17% të popullsisë të cilësuar si rini.
Në tërësi, për sa i përket BE-së, nga 447.3 milionë që është popullata totale, 73,6 milionë banorë bëjnë pjesë në grupin rinor./Albanianpost