Kryeministri në detyrë, Albin Kurti, u pyet sot nëse partia e tij do të dërgojë mandatarin për kryeministër te presidentja, por ai u përgjigj shkurt, duke thënë se vendimi pritet të merret në mbledhjen e Këshillit të Përgjithshëm të dielën.
“Kemi mbledhje të Këshillit të Përgjithshëm të dielën,” tha Kurti.
Të mërkurën, kryetari i Partisë për Liri, Drejtësi dhe Mbijetesë, Nenad Rashiq, u shpreh i sigurt që presidentja Osmani nuk do ta mandatojë kandidatin e VV-së për kryeministër derisa të flasë Gjykata Kushtetuese për ankesën e Listës Serbe.
Në një intervistë për KosovaPress, ai tha se pret që Gjykata Kushtetese do të vendosë masë të përkohshme për shpalljen e konstituimit të Kuvendit të Kosovës.
Ndërsa, presidentja Osmani ka pasur një takim me kryetarin e Kuvendit, Dimal Basha, në fillim të kësaj jave.
Pas takimit, përmes një kumtese për media nga zyra e të parës së shtetit, është thënë se ajo, bashkë me ekipin e saj ligjor, po analizojnë situatën në Kuvend që më pas të kenë një qëndrim.