Kandidati për kryetar të Ferizajt, Agim Aliu, ka zhvilluar një takim me drejtuesit e Klubit të Basketbollit “BC Ferizaj”, me të cilët ka biseduar për planet dhe vizionin për zhvillimin e mëtejshëm të këtij sporti në qytet.
Në postimin e tij në rrjete sociale, Aliu ka treguar se gjatë “një kafeje e bashkëbisedimi të këndshëm” me kryetarin e klubit, Shpëtim Bega, dhe drejtues të tjerë energjikë, është diskutuar për mënyrat se si të ringrihet dhe fuqizohet basketbolli ferizajas.
“Kafe e bashkëbisedë e këndshme me drejtuesit energjiplotë të Klubit të Basketbollit ‘BC Ferizaj’, prirë nga kryetari i klubit Shpëtim Bega, ku diskutuam për vizionin tonë për ta ringritur e fuqizuar sportin e basketbollit në Ferizaj,” ka shkruar Aliu.
Ai ka theksuar se sporti do të mbetet një ndër prioritetet e tij, si pjesë e angazhimit për zhvillimin e rinisë dhe promovimin e vlerave të shëndetshme në komunë.