Zyra e Rregullatorit të Energjisë (ZRRE) ka vensosur që të mos e pezullojë vendimin e vet për liberalizimin e tregut të energjisë elektrike, pavarësisht prej aktvendimit të Gjykatës Supreme në lidhje me këtë çështje.
Vendimi është miratuar në një mbledhje të ZRRE-së të enjten.
Sipas ZRRE-së, aktvendimi i Supremes nuk i obligon ata që të pezullojnë liberalizimin e tregut të energjisë, por vetëm largimin e dy neneve në aktet nënligjore.
ZRRE ka thënë se vendimi i Gjykatës shfuqizon një nen të Udhëzuesit për Liberalizimin e Tregut të Energjisë të vitit 2017, si dhe një nen të Udhëzuesit për Ndryshimin dhe Plotësimin e Udhëzuesit në fjalë.
Gjykata Supreme e Republikës së Kosovës kishte shpallur të paligjshme dhe kishte shfuqizuar nene të Udhëzuesit për Liberalizimin e Tregut të Energjisë Elektrike.
Gjykata kishte konstatuar se mospërputhjet ndërmjet dispozitave ligjore dhe të akteve nënligjore kanë ndikuar në krijimin e një situate të pasigurisë ligjore dhe ekonomike për konsumatorët e energjisë elektrike.