Presidentja e Kosovës, Vjosa Osmani, sot ka njoftuar se gjatë kësaj jave kishte kërkuar nga Ministrja e Punëve të Jashtme dhe Diasporës, Donika Gërvalla që t’i shpallë “non grata” dy zyrtarë të Rusisë që kanë punuar në Zyrën Ndërlidhëse të Federatës Ruse në Kosovë.
Lidhur me këtë, kryetari i Aleancës për Ardhmërinë e Kosovës (AAK), Ramush Haradinaj, ka reaguar në një postim në Facebook duke thënë se e mbështet kërkesën e presidentes Osmani dhe vendimin e MPJD-së rreth dëbimit të dy zyrtarëve nga Rusia nga Kosova.
“Secili që tejkalon rregullat e qëndrimit në vendin tonë, duhet të trajtohet sipas ligjit. Ndikimi rus në destabilizimin e Kosovës dhe rajonit, duhet të luftohet me vendosmërinë më të madhe nga institucionet tona”, u shpreh ai.