Pas ndikimeve në Këshillin Prokurorial e atë Gjyqësor, Qeveria në detyrë synon ndërhyrjen edhe në Odën e Avokatëve të Kosovës.
Qeveria e drejtuar nga Albin Kurti pritet që të anulojë dy vendime shumë të rëndësishme të Odës së Avokatëve, duke ndikuar kështu në pavarësinë e tyre.
Në mbledhjen e Qeverisë e cila do të mbahet nesër, pritet të votohet propozim vendimi për ndalimin e ekzekutimit të një rregulloreje të OAK dhe ndalimin e ekzekutimit të aktit administrativ të Odës lidhur me lartësinë e shpenzimeve.
Minstrja e Drejtësisë, Donika Gërvalla ka propozuar që këto akte të Odës të anulohen derisa gjykatat të marrin vendime përfundimtare lidhur me shqyrtimin e këtyre çështjeve.
“Shqyrtimi i Propozim-vendimit për ndalimin e ekzekutimit të Rregullores për pranimin dhe trajtimin e thirrjeve telefonike në sistemin e caktimit të avokatëve, sipas detyrës zyrtare (exofficio) të Odës së Avokatëve të Kosovës, deri në vendimin përfundimtar të gjykatës kompetente
Shqyrtimi i Propozim-vendimit për ndalimin e ekzekutimit të aktit administrativ mbi lartësinë e shpenzimeve për regjistrim Odës së Avokatëve të Kosovës, deri në vendimin përfundimtar të gjykatës kompetente”, thuhet në komunikatën e Qeverisë ku parashihen pikat e rendit të ditës për mbledhjen e nesërme.
Oda është një organizatë vetëqeverisëse, demokratike e pavarur nga organet shtetërore, e cila për qëllim ka avancimin e sundimit të së drejtës.