Pavarësisht armëpushimeve dhe ndryshimit të fronteve ushtarake, luftërat e Izraelit vazhdojnë pa një fund të qartë apo përfitime të qëndrueshme të sigurisë. Më pak se një javë pas nënshkrimit të memorandumit të mirëkuptimit midis Teheranit dhe Washingtonit, i cili i dha fund luftës tre mujore SHBA-Izrael kundër Iranit, opinioni publik në Izrael është shprehur qartë.
Sipas një sondazhi të fundit, 92 përqind e izraelitarëve mendojnë se SHBA-ja ka hequr dorë nga fitorja e tyre ndaj një armiku të vjetër. Pothuajse gjysma e të anketuarve kërkojnë që Izraeli të vazhdojë sulmet ndaj Libanit dhe grupit Hezbollah, pavarësisht qëndrimit të Washingtonit. Izraeli ka qenë i përfshirë në konflikte të vazhdueshme që nga sulmi i udhëhequr nga Hamasi më 7 tetor 2023, i cili la 1 139 të vdekur.
Në Gaza, më shumë se 73 000 palestinezë janë vrarë, ndërsa Izraeli ka ndërmarrë sulme ndaj Iranit, Hezbollah-it në Liban, si dhe inkursione në Siri dhe sulme ndaj Houthi-ve në Jemen. Brenda parlamentit izraelit, mbështetja për këto luftëra mbetet një nga pikat e rralla të konsensusit. Gadi Eisenkot, ish-shef i shtabit dhe kandidat për të zëvendësuar kryeministrin Benjamin Netanyahu, i ka përshkruar sulmet ndaj Teheranit si “luftën më të drejtë në dekadat e fundit”.
Sociologu Daniel Bar-Tal nga Universiteti i Tel Avivit shpjegon se ky reagim buron nga proceset politike dhe mediatike që e lidhin sulmin e 7 tetorit me Holokaustin. Sipas tij, ndjenja e viktimizimit kolektiv dhe delegjitimimi i palestinezëve janë rrënjosur në ndërgjegjen e shumicës së izraelitarëve. Megjithatë, pak njerëz në Izrael besojnë se vendi është më i sigurt se sa ishte përpara tetorit të vitit 2023.
Analisti Shaiel Ben-Ephraim vlerëson se nuk ka asnjë arritje që do ta ndalojë këtë “luftë të përjetshme”. Ai thekson se Netanyahu, i cili përballet me akuza për korrupsion dhe kritika për dështimet e sigurisë, e sheh vazhdimin e luftës si një mënyrë për të shmangur përgjegjësinë. Sipas Ben-Ephraim, doktrina e mbrojtjes e udhëheqësve izraelitë bazohet në shkatërrimin e çdo kërcënimi përpara se ai të zhvillohet, duke e bërë gjasën për luftëra të ardhshme pothuajse të sigurt.
Burimi: aljazeera.com