Ndërsa Evropa po përballet me një valë të nxehti rekord, kompanitë e teknologjisë po përpiqen të mbajnë në funksion çipat e fuqishëm në qendrat e të dhënave të AI-së. Temperaturat e larta kanë ndikuar në infrastrukturën kritike, duke përfshirë fabrikat, termocentralet bërthamore dhe qendrat e të dhënave. Kërkesa e shtuar për kondicionim po mbingarkon rrjetet elektrike, duke shkaktuar ndërprerje që mund të dëmtojnë operacionet.
Patrick McBride, kreu i ndërtimit ndërkombëtar në Zurich, deklaroi për CNBC se gjatë tre viteve të fundit, moti i ashpër është bërë shkaku kryesor i humbjeve në portofolin e riskut të ndërtuesve të qendrave të të dhënave në SHBA. Sipas tij, zhvendosja e qendrave në zona rurale, ku të dhënat për motin ekstrem janë të kufizuara, ka ekspozuar asete me vlerë 3 miliardë dollarë ndaj rreziqeve të tilla.
Një studim nga firma First Street zbuloi se 79% e kapacitetit global të qendrave të të dhënave përballet me rreziqe të shtuara nga përmbytjet, erërat ekstreme dhe zjarret. Joe Macejak, drejtues i infrastrukturës digjitale në Marsh Risk, theksoi se kompanitë duhet të identifikojnë dhe menaxhojnë këto rreziqe klimatike për të shmangur kostot e larta dhe ndërprerjet operacionale që kërcënojnë investimet në sektorin e AI-së.
Sivjet, 64% e kapacitetit të qendrave të të dhënave në ndërtim ndodhet jashtë qendrave tradicionale, duke u zhvendosur në tregje si Teksasi, Tennessee, Wisconsin dhe Ohio. McBride paralajmëroi se këto objekte janë të ekspozuara ndaj tornadove, breshrit dhe erërave të forta që mund të dëmtojnë sistemet e ftohjes dhe instalimet diellore. Ndërkohë, në Evropë, qendrat po zhvendosen drejt Gadishullit Iberik, ku temperaturat po rriten.
Mishal Thadani, CEO i platformës Rhizome, shpjegoi se nxehtësia ekstreme shton ngarkesën në rrjetin elektrik pikërisht kur qendrat e të dhënave kërkojnë më shumë energji për ftohje. Ai përmendi rastin e Turinit në maj, ku temperaturat rreth 38 gradë Celsius shkaktuan stres termik në kabllot nëntokësore dhe ndërprerje të energjisë.
Microsoft po përgatitet përmes përzgjedhjes së vendndodhjeve dhe monitorimit në kohë reale, ndërsa Nvidia ka njoftuar se serverët e saj të rinj mund të përdorin lëng ftohës deri në 45 gradë Celsius. Aaron Lewis nga Johnson Controls theksoi se inovacioni në teknologjitë e ftohjes është thelbësor për të siguruar që qendrat e të dhënave të funksionojnë në kushte të ndryshueshme klimatike.
Burimi: cnbc.com