Kur shkollat në Britani u mbyllën më herët javën e kaluar për shkak të temperaturave rekord që arritën në 100 gradë Fahrenheit (rreth 37.8 gradë Celsius), duke shënuar qershorin më të nxehtë të regjistruar ndonjëherë, kinematë përjetuan një fluks të papritur. Raportet treguan se sallat ishin të mbushura gjatë orëve të mesditës, pasi prindërit kërkonin ambiente të klimatizuara për të mbajtur fëmijët të freskët dhe të argëtuar.
Filmi “Toy Story 5” kishte shënuar tashmë debutimin më të madh të vitit në Britani, me 20.2 milionë dollarë fitime dhe 72% të pjesëmarrjes në shitjen e biletave gjatë tri ditëve të para. Të dhënat e datës 29 qershor tregojnë se fitimet totale të filmit në Britani arritën në 38.6 milionë dollarë, me një rritje të ndjeshme gjatë ditëve të mesit të javës, përpara se temperaturat të binin gjatë fundjavës.
Phil Clapp, drejtor ekzekutiv i Shoqatës së Kinemave në Britani, deklaroi për Variety se ndonëse valët e të nxehtit mund të ndihmojnë shitjet, ekziston gjithmonë shqetësimi se temperaturat ekstreme mund t'i mbajnë njerëzit brenda shtëpive. Megjithatë, ai shtoi se kjo nuk ndodhi këtë javë, pasi “Toy Story 5” gjeneroi mbi 1 milion paund (rreth 1.3 milion dollarë) në ditë, edhe gjatë ditëve më të nxehta.
Zinxhirët e kinemave Odeon dhe Picturehouse nuk dhanë shifra specifike, por theksuan se shikimi i filmave mbetet një aktivitet i përshtatshëm për çdo mot. Një zëdhënës i Odeon u shpreh se kinematë ofrojnë një përvojë të mirë pavarësisht kushteve atmosferike, ndërsa Picturehouse theksoi se oferta e tyre prej 3 paundësh për biletat e fëmijëve po tërheq familjet.
Përvoja nuk ishte gjithmonë e freskët, pasi në disa kinema u raportuan dështime të sistemeve të klimatizimit. Në Francë, ku temperaturat ishin edhe më të larta, Marc-Olivier Sebbag nga Federata Kombëtare e Kinemave Franceze raportoi për Le Monde se numri i shikuesve në javën e 17-23 qershorit ishte 50% më i lartë se vitin e kaluar dhe 36% më i lartë krahasuar me periudhën para pandemisë (2017-2019).
Burimi: variety.com